Macarıstanın paytaxtı Budapeştdə keçirilən Avropa çempionatında sərbəst güləş üzrə mübarizəyə yekun vurulub.
Sportarena.az xəbər verir ki, baş məşqçi Namiq Abdullayev, böyük məşqçi Zəlimxan Hüseynov və məşqçi Arif Abdullayevin rəhbərliyi yarışa tam heyətlə yollanan yığmanın 10 üzvündən 7-si fəxri kürsüyə qalxıb. Maqomedxan Maqomedov (97 kq) qızıl, Abubakr Abakarov (86 kq) gümüş, Əliabbas Rzazadə (57 kq), Hacı Əliyev (65 kq), Turan Bayramov (74 kq), Əşrəf Aşırov (79 kq) və Osman Nurmaqomedov (92 kq) isə bürünc medal qazanıb.
Yekunda 159 xal toplayan milli komanda hesabında Avropa çempionu olub! Maqomedxan 25, Abubakr 20, Əliabbas, Hacı, Turan, Əşrəf və Osman 15 xalı komandanın hesabına yazıb. Zirəddin Bayramov yığmaya 10, Aydın Əhmədov 8, İslam Bazarqanov isə 6 xal qazandırıb.
Azərbaycan 2-ci pillədə qərarlaşan Türkiyəni 18 xal qabaqlayıb. Üçüncü yeri tutan Gürcüstan isə 133 xal toplayıb. Beləliklə, sərbəst güləş üzrə yığması 3-cü dəfə Avropanın ən güclü komandası ünvanına sahib çıxıb.
Milli 2009-cu ildə Litvanın paytaxtı Vilnüsdə və 2017-ci ildə Serbiyanın Novi Sad şəhərində təşkil olunan analoji yarışlarda da qitə çempionu olub.
Bu, sərbəst güləşçilərin son 1 ayda ikinci uğurudur. Martın 7-13-ü tarixlərində Bolqarıstanın Plovdiv şəhərində baş tutan U-23 Avropa çempionatında da müvafiq millimiz komanda hesabında 1-ci yeri tutmuşdu.