“Məşqlərimiz öz axarı ilə davam edir. Hazırlığımız yaxşı gedir, üzərimizə düşəni edib, verilən tapşırıqların öhdəsindən gəlməyə çalışırıq”.
Sportarena.az xəbər verir ki, bu sözləri “Kəpəz”in futbolçusu Tural Nərimanov deyib.
Təcrübəli müdafiəçi Azərbaycan Premyer Liqasının XXIX turunda komandasının qarşılaşacağı “Qarabağ” ilə oyun öncəsi klubun rəsmi saytına açıqlama verib:
“Ötən turdakı məğlubiyyət bizim üçün gözlənilməz oldu. AZAL yenilgisini yaxşı nəticə ilə unutdurmaq istəyirik. Bütün hazırlığımız buna hesablanıb”.
Futbolçu son günlər cəbhə xəttində yaşananlara münasibət bildirib:
“Təbii ki, düşmən tərəfinin addımlarını pisləyirik. Bir tərəfdən igid oğullarımızın şəhid olmasına üzülürüksə, digər tərəfdən onların qəhrəmanlıq göstərərək torpaqlarımızı azad etməsi bizi sevindirir. Əsgərlərimizin sayəsində futbol oynayırıq, onların döyüşdəki qələbələri bizi daha da ruhlandırıb. Mən özüm hərbi xidmətdə olmuşam, futbolçu olmağıma baxmayın, biz də əsgərik. Hər zaman döyüşməyə hazırıq. Vəziyyətlə bağlı legioner olan komanda yoldaşlarımıza da xəbərlər vermişik. Qoy onlar Azərbaycan həqiqətlərini bilsinlər”.